पाल्पा । ग्रामीण क्षेत्रका किसानलाई सहज रूपमा कृषि तथा पशुपन्छी सेवा उपलब्ध गराउने उद्देश्यले सञ्चालन गरिएको एक दिने कृषि तथा पशुपन्छी सेवा शिविरले माथागढी गाउँपालिकाका किसानमा नयाँ उत्साह थपेको छ । गाउँपालिकाको वडा नं. २ दद्रामा सम्पन्न शिविरले किसानलाई घरआँगनमै प्राविधिक सेवा, परामर्श तथा आवश्यक औषधि उपलब्ध गराउँदै प्रत्यक्ष लाभ पु¥याएको हो ।
कृषि र पशुपालनलाई ग्रामीण अर्थतन्त्रको मुख्य आधार मानेर माथागढी गाउँपालिकाले यस क्षेत्रलाई उच्च प्राथमिकतामा राख्दै आएको छ । किसानको उत्पादन वृद्धि, पशुपालनको गुणस्तर सुधार तथा आयआर्जन बढाउने लक्ष्यका साथ गाउँपालिकाले विभिन्न कार्यक्रम सञ्चालन गरिरहेको छ । त्यही अभियानअन्तर्गत आयोजना गरिएको शिविरले किसानका समस्या पहिचान गरी तत्काल समाधान दिन सहयोग गरेको गाउँपालिकाको भनाइ छ ।
शिविरमा गाउँपालिका अध्यक्ष यमबहादुर चिदीले कृषकलाई आत्मनिर्भर र व्यावसायिक बनाउन पालिकाले विभिन्न कार्यक्रम सञ्चालन गरिरहेको बताउनुभयो । उहाँले कृषकलाई समयसापेक्ष तालिम, उन्नत बीउबिजन तथा प्राविधिक सहयोग उपलब्ध गराउँदै आएको उल्लेख गर्दै शिविरले उत्पादन वृद्धि र आम्दानी बढाउन महत्वपूर्ण भूमिका खेल्ने विश्वास व्यक्त गर्नुभयो । “कृषिमा आधुनिकीकरण र व्यवसायीकरण बिना आर्थिक समृद्धि सम्भव छैन, त्यसैले पालिका किसानमैत्री कार्यक्रमलाई प्राथमिकतामा राख्दै अघि बढेको छ,” अध्यक्ष चिदीले भन्नुभयो ।
किसानलाई सेवा लिन सदरमुकाम वा पालिका केन्द्रसम्म पुग्नुपर्ने बाध्यता अझै धेरै ग्रामीण बस्तीमा देखिन्छ । यस्तो अवस्थालाई मध्यनजर गर्दै वडा नं. २ का वडाध्यक्ष बोमबहादुर ठाडाले कृषकको आवश्यकता र समस्यालाई नजिकबाट बुझ्न तथा तत्काल समाधान दिनकै लागि शिविर आयोजना गरिएको बताउनुभयो । उहाँका अनुसार यस्ता कार्यक्रमले किसानलाई सेवा लिन टाढा धाउनुपर्ने बाध्यता हटाउने, समय बचत गर्ने र आर्थिक भारसमेत कम गर्ने भएकाले प्रभावकारी साबित भएका छन् ।
शिविरमा कृषि शाखाका प्रमुख शशी बिष्ट तथा पशु सेवा शाखाका प्रमुख विक्रम गरम्जा मगरसहितको प्राविधिक टोलीले निःशुल्क माटो परीक्षण, गोबर परीक्षण, बाली तथा पशु रोग सम्बन्धी परामर्श सेवा उपलब्ध गराएको थियो । साथै आवश्यक कृषि तथा पशु औषधि पनि निःशुल्क वितरण गरिएको थियो । प्राविधिकहरूले खेतबारी र पशुपालनसँग सम्बन्धित समस्याबारे प्रत्यक्ष सुझाव दिएपछि किसानले आफ्ना जिज्ञासा समाधान गर्न पाएका थिए ।
वडा नं. २ र ३ का किसानलाई लक्षित गरी सञ्चालन गरिएको शिविरबाट करिब ९० जना कृषक लाभान्वित भएका छन् । सहभागी किसानहरूले घरदैलोमै प्राविधिक सेवा पाउँदा सहज भएको, उपचार तथा परामर्शका लागि अन्यत्र जानुपर्ने झन्झट हटेको र खर्चसमेत बचत भएको बताएका छन् । शिविरले कृषि उपज तथा पशुपालनमा देखिने रोग व्यवस्थापन, उत्पादन वृद्धि र आधुनिक प्रविधिको प्रयोगबारे जानकारी दिन महत्वपूर्ण योगदान पु¥याएको कृषकहरूको अनुभव छ ।
माथागढी गाउँपालिकाले पछिल्ला वर्षहरूमा कृषि क्षेत्रलाई विकासको प्रमुख आधारका रूपमा अघि बढाउँदै आएको छ । कृषि उत्पादन वृद्धि, व्यावसायिक खेती प्रवद्र्धन, पशुपालन विस्तार तथा किसानको आयस्तर उकास्ने कार्यक्रमलाई निरन्तरता दिँदै आएको गाउँपालिकाले जनाएको छ । प्रमुख प्रशासकीय अधिकृत सुन्दर प्रसाद श्रेष्ठका अनुसार ग्रामीण क्षेत्रमा कृषि उत्पादन वृद्धि, पशुपालनको गुणस्तर सुधार तथा किसानको आयआर्जन बढाउने अपेक्षासहित शिविर सञ्चालन गरिएको हो । स्थानीय सरकारले सेवामूलक कार्यक्रमलाई निरन्तरता दिएर कृषिबाट आत्मनिर्भरता हासिल गर्ने उद्देश्यले प्राथमिकताका साथ यस्ता कार्यक्रम सञ्चालन गरिरहेको उहाँले बताउनुभयो ।
(जनतासंग माथागढी)
